真人真事~屯門駕車...

妹仔仔

呢件事發生係上年既8月尾...點解會記得咁清楚？睇埋後面就知。

其實呢件事唔算我親身經歷，我隻算係半個參與其中o者(因為見到果個唔係我...呼..好彩！)。
8月尾其中一個夜晚，大概零晨兩點零鐘，我同我男朋友出完街，就駕車番屯門屋企。
當行完屯門公路，靠左轉入大欖、黃金海岸方向。
上左一條小彎位之後，即係果個乜野公務員宿舍(我唔sure叫乜名)對出有個迴旋處，當經過迴旋處時(由於我地係轉去黃金果邊，所以迴旋處係o係我地既右手邊)，我男朋友無啦啦爆左句粗口..(類似pk之類啦..哈哈)。
我就即刻問佢：「做乜呀？」
佢好冷靜咁同我講：「無野無野，唔好講。」
我又死心不息係咁問...佢一路就話無野，仲叫我唔好出聲。
我心諗：「好，我忍你！」
之後佢就一聹茞蚆n咁講：「好驚好驚...」
我見到佢面都青曬...我就心知不妙，因為佢間唔中都會見到果d野。
到過左黃金，佢先敢同我講發生咩事。
原來頭先過迴旋處既時候，佢見到迴旋處上面企左個人！
開初佢以為自己眼花，因為迴旋處上面放左幾個雪糕筒(果時直去青龍頭果條橋仲未起好)。
但望真d，佢發現真係有個人企左係雪糕筒上面，唔可以話係企，應該係半個身融入左個雪糕筒度。
我就奇怪佢點解會咁驚，因為平時佢間唔中都會見到，佢無乜反應架喎。
佢話係第一次見到隻野全身青光，而且面露兇光，最恐怖既係佢既衣著，竟然係好似我地平時見到既壽衣！
(註：佢以前見親果d，都係好似我地平常人咁，唔會話個樣好恐怖呀、著白長袍呀果d，佢話唔會睇得好清楚個樣同衣著，但就會好似一層霧咁，一個矇矓既人影)
我聽到都嚇左一嚇...即係問佢：「咁佢有無望到你望佢呀？」
佢話好彩無，因為佢係望住落大欖果個方向。
聽完我都安心d...然後就安慰佢囉...因為我都係第一次見到佢咁驚。
然後我地就繼續回家既路，當時我就貪得意，拎個電話出黎按下個月曆(因為我知果段日子係農曆7月)，我仲同我男朋友講笑話，唔知會唔會咁o岩係7月14呢...唉...點知咁都俾我講中...不過又唔算中既，因為我地淩晨兩點幾，即係剛剛過左7月14果晚。
但睇到月曆果下，個心真係好寒好寒。

當我地以為已經告一段落既時候...點知到第二日，又發生左一個令我更驚既小插曲。
第二日我地去食早餐，買左份報紙睇，點知俾我睇到一單新聞...嚇到我早餐都食唔落。
單新聞係話係淩晨四、五點，係大欖迴旋處(向大欖方向)發生一單交通意外，車上兩男一女(定唔知兩女一男)係果個迴旋處炒車，其中一人危眙...我地都估呢單車禍應該唔係我地見到野果晚發生，應該係前一晚(即農曆7月14正日)，因為如果係我地見到果晚，應該趕唔切登。
其實會唔會係果隻野要搵替身，但果晚單車禍，又未有人死，所以佢繼續係度等？
我真係唔知...